Emeli aň arkaly döredilen mazmunlar bilen işlemekde awtorlyk hukugyny goramak meselesi häzirki wagtda iň maslahatlaşylýan mowzuklaryň biri bolmagynda galýar. OpenAI keşpleri döredijilere "Sora" serwisinde olaryň ulanylyşyna has köp gözegçilik hukugyny bermek meýilleri barada mälim etdi. Sora – emeli aň arkaly wideo döretmäge niýetlenen gural bolup durýar.
Kompaniýanyň ýolbaşçysy Sem Altman hukuk eýeleriniň Sora ulgamynda öz keşpleriniň ulanylyşyny çäklendirip biljekdigini ýa-da olary töleg esasynda peýdalanmaga rugsat berip biljekdigini aýtdy. Mysal üçin, telekompaniýalar we kino studiýalary öz gahrymanlarynyň göçürilmegini gadagan edip bilerler. Reuters agentliginiň maglumatyna görä, Disney studiýasy eýýäm mazmunyny şu usul bilen goramak isleýär.
Altman OpenAI-niň şeýle hem monetizasiýa (girdeji gazanmak) mehanizmini işläp taýýarlap başlandygyny aýtdy: keşpleriniň ulanylmagyna rugsat berýänler, awtorlyk hakyna meňzeş baýraga – roýalti görnüşinde girdeji alyp bilerler.
Onuň sözlerine görä, Sora arkaly wideo döretmäge bolan gyzyklanma garaşylýandan has ýokary bolup çykdy. Köp ulanyjylar özara çäkli tomaşaçy topary üçin wideolar döredýärler. Şonuň üçin aýdyň düzgünleriň we gazanç mümkinçilikleriniň bolmagy zerur hasaplanýar. Şol bir wagtda, Altman monetizasiýanyň täsirli modelini gysga wagtda tapmagyň mümkin däldigini belläp, iň amatly görnüşini saýlap tapmak üçin kompaniýanyň dürli synaglara taýyndygyny aýtdy.
