Monreal uniwersitetiniň alymlary çaga heniz ene göwresindekä daşary ýurt dilini eşiden bolsa, onuň beýnisiniň bu dili tapawutlandyryp we bölekleýin özleşdirip bilýändigini anykladylar. Göwrelilik döwründe birnäçe hepdäniň dowamynda başga dilde gürrüňleri diňlemek, çaganyň sözleýşi kabul etmegine jogap berýän nerw ulgamlarynyň işjeňligini üýtgedip biler.
Barlaga fransuz dilinde gürleýän 60 aýal gatnaşdy. Göwrelilikleriniň 35-nji hepdesinden başlap olar yzygiderli fransuz dilindäki we daşary ýurt dilleriniň (nemes ýa-da ýewreý) birindäki gysga hekaýalaryň audioýazgylaryny diňlediler.
Doglandan soň bäbeklere şol ýazgylar gaýtadan diňledildi. Alymlar olaryň beýnisiniň işjeňligini funksional infragyzyl spektroskopiýa arkaly hasaba aldylar.
Netijelere görä, täze doglan çagalarda fransuz dilindäki ýa-da tanyş bolan daşary ýurt dilindäki gepleşik eşitdirilende, uly adamlarda ene dilini kabul edende bolşy ýaly, beýniniň şol bir bölekleri işjeňleşdi. Emma düýbünden täze bir dil goýberilende, bäbekleriň beýnisi has gowşak jogap berdi.
Barlagyň awtorlary bu maglumatlaryň çagalaryň heniz dogulmazdan ozal hem beýnileriniň ýokary çeýeligini tassyklaýandygyny we olaryň irki dil ösüşini mundan beýläk öwrenmek üçin mümkinçilikleri açýandygyny nygtadylar.
