Kriştianu Ronaldunyň baýlygy 1,4 mlrd dollardan geçdi. Netijede, ol taryhda ilkinji milliarder futbolçy boldy. Bu maglumatlar Bloomberg-iň milliarderler indeksinden gelip çykýar.
Iýunda 40 ýaşly portugaliýaly hüjümçi “Al-Nasr” bilen 400 mln dollarlyk täze şertnama baglaşdy. Agentligiň hasaplamalary boýunça, 2023-nji ýylda oýunçynyň saud klubuna geçmegi oňa salgyt tölemezden zähmet haky we bonuslar görnüşinde ýylda, takmynan, 200 mln dollar töleg barada şertnama, şeýle-de 30 mln dollar möçberde şertnama bonusy ýaly goşmaça ýeňillikleri getirdi.
2002-nji ýyldan 2023-nji ýyl aralygynda Ronaldu klublarda 550 mln dollardan gowrak gazandy. Ol Nike bilen ýylda tas 18 mln dollarlyk onýyllyk şertnama baglaşdy we Armani hem Castrol brendleri bilen hyzmatdaşlyk etdi. Bu hem onuň baýlygyna 175 mln dollar goşdy.
Karýerasynyň dowamynda Ronaldu Lissabonyň “Sporting”, Angliýanyň “Mançester Ýunaýted” klublarynda, Madridiň “Realynda” we Turiniň “Ýuwentusynda” çykyş etdi. Portugaliýanyň milli ýygyndysynyň düzüminde 223 oýna gatnaşyp, 141 gol geçirdi, 2016-njy ýylda Ýewropa çempiony we iki gezek UEFA-nyň Milletler ligasynyň ýeňijisi boldy. Ol “Altyn topuň” bäş gezek eýesidir.
Ýakynda Ronaldu dört dürli klub üçin 100 gol geçiren ilkinji futbolçy boldy: “Real Madrid” üçin – 450, “Mançester Ýunaýted” – 145, “Ýuwentus” – 101, “Al-Nasr” – 100.
