Ýewropanyň kosmos agentligi (ESA) Awstraliýanyň Nýu-Norsiýa şäherindäki stansiýada uzak kosmos bilen aragatnaşyk üçin Estrack ulgamynyň dördünji antennasyny açdy.
Onuň diametri 35 metr bolup, Ýewropada has döwrebap we kuwwatly antenna hasaplanýar. Ol NASA-nyň DSN aragatnaşyk ulgamynyň antennalary bilen deňleşip bilýär.
Antenna –263°C çenli sowadylýan ýokary derejede duýgur komponentler bilen enjamlaşdyryldy, bu hem milliardlarça kilometr uzaklykda has gowşak signallary-da tutmaga mümkinçilik berýär. Ol Ýewropanyň kosmos missiýalary bilen aragatnaşyk saklamak üçin ulanylar, şeýle-de ABŞ-nyň, Ýaponiýanyň we Hindistanyň agentlikleri üçin elýeterli bolar. Aýratyn ýagdaýlarda ESA hytaý taslamalaryna-da goldaw berer.
Antenna 2026-njy ýylda doly derejeli ulanylyp başlanar, ýöne synag wagtlary ol eýýäm Euclid teleskopyndan signallary kabul etdi. Toplumyň gurluşygy 62,3 mln ýewro düşdi we dört ýyl dowam etdi. Ony gurmak üçin stansiýanyň saýlanmagy işi aňsatlaşdyrdy – ol 2003-nji ýyldan bäri işleýär we onuň taýýar infrastrukturasy bar.
Täze antenna bilen birlikde Estrack ulgamy Argentinadaky (Malargue) we Ispaniýadaky (Sebreros) antennalary öz içine alýar, bu hem kosmosdaky enjamlar bilen üznüksiz diýen ýaly aragatnaşygy üpjün etmäge mümkinçilik berýär. Nýu-Norsiýada Günorta Amerikadaky Kuru kosmodromyndan amala aşyrylan uçuşdan soň raketalar bilen aragatnaşyk saklamak üçin 4,5 metrlik antenna hem bar.
