Dünýä ýurtlary ölçegi boýunça ägirt uly kontinental kuwwatly döwletlerden başlap, kiçijik ada döwletlerine çenli ululykda dürli-dürli bolýar. Visualcapitalist portalynyň täze taslamasy muny wizual görnüşde aýdyň görkezýär: diagrammada gury ýerleri we içerki suw desgalaryny - kölleri, derýalary we suw howdanlaryny göz öňünde tutmak bilen, her bir ýurt çäginiň ululygyna görä ýerleşdirilen.
Russiýa, Kanada, Hytaý we ABŞ ýeriniň meýdany boýunça dünýäde öňdeligi eýeleýär. Olar bilelikde Ýer togalagynyň üçden bir bölegini tutýarlar. Russiýa ynamly ýagdaýda öňdebaryjy orny eýeleýär. Onuň territoriýasy 11 wagt zolagyndan geçýär we ýeriniň 65%-den gowragy hemişelik doňaklykda ýerleşýär.
Kanada tebigy şertleri boýunça Russiýanyň şertlerine golaý. Onuň demirgazygy tundra we taýga bilen örtülendir, Arktikanyň howasy bolsa ýeriniň ep-esli bölegini ýaşamaga ýaramsyz edýär. Gyzykly tarapy, Kanadanyň san maglumatyna görä, ýurduň ilatynyň takmynan 66%-i ABŞ-nyň serhedinden 100 km uzaklykda ýaşaýar.
Iň kiçijik döwlet - Monako. Ol bary-ýogy 2,1 inedördül kilometri tutýar we 39 000 töweregi ilaty bilen planetanyň iň gür ilatly ýerleriniň biri bolmagynda galýar. Soňra Gibraltar gelýär, ol Beýik Britaniýanyň deňiz aňyrsynda ýerleşýän ýeri bolup, meýdany 6,8 inedördül kilometre deň hem-de Atlantik we Ortaýer deňizleriniň arasyndaky möhüm deňiz ýoluna gözegçilik edýär.
Türkmenistan 491,200 km² meýdany bilen dünýäde 52-nji, Merkezi Aziýada ikinji ýerde durýar. Bu Ýeriň gury ýer meýdanynyň takmynan 0,33% -ini düzýär. Sanawda ýurt Ispaniýa (506 müň km²) bilen Kamerunyň (475,4 müň km²) arasynda ýerleşýär.
