Duşenbe gününe geçilen gije Indoneziýanyň Çirebon şäheriniň ýaşaýjylary ýiti ýagtylygyň we güýçli sesiň şaýady boldy. Asmandan uly meteor uçup geçip, Ýawa deňzine gaçdy diýip, Milli gözleg we innowasiýa agentliginden (BRIN) astronomiýa professory Tomas Jamaluddin habar berdi.
Çirebonyň Meteorologiýa, klimatologiýa we geofizika agentliginiň maglumatlaryna görä, seýsmiki datçikler ýerli wagt bilen 18:39-da zarba tolkunyny hasaba aldy, wideo gözegçilik kameralary bolsa 18:35-de meteoryň gaçyşyny düşürdi.
Jamaluddin meteor atmosfera girende güýçli sesi çykaran zarba tolkunyny döredendigini, ýöne suwa gaçmagyň ýangyna sebäp bolmandygyny we ilat üçin howp salmandygyny düşündirdi.
Alym meteoritiň ululygyny 3-5 metr diýip hasaplady we ony 2013-nji ýylda Çelýabinskä gaçan meteorit bilen deňeşdirdi. Onuň aýtmagyna görä, Indoneziýada şeýle uly meteorlar örän seýrek – birnäçe onýyllykda bir gezek duşýar we olary hereket tizliginiň ýokarydygy sebäpli öňünden çaklap bolmaýar.
Çirebonyň gündogar etraplarynyň, aýratynam, Lemahabangyň ýaşaýjylary hadysanyň şaýatlary boldy.
