“Doga: Soňky dessurlar” (Заклятие: Последний обряд) filmi dünýä prokatynda haýran galdyryjy üstünlik gazanyp, franşizada iň girdejili bölüm boldy. Tomaşaçylary Eda bilen Lorreýn Uorrenleriň hekaýatynyň soňuny görkezmek wadasy özüne çekdi.
Warner Bros. studiýasynyň maglumatlaryna görä, filmiň dünýädäki kassa ýygymy 458,2 mln dollardan geçdi: film olardan 167,8 mln dollary ABŞ-da we 290,4 mln dollary beýleki ýurtlarda gazandy. Şeýlelikde, “Doga 4” ähli döwürleriň iň köp girdeji gazanan horrorlarynyň üçlügine girdi (inflýasiýany hasaba almazdan).
Ondan öňde diňe iki film – “Ol” (Оно / $704,1 mln) we onuň dowamy ($473,1 mln) bar. Ikisi-de Warner Bros. tarapyndan düşürildi.
Soňky on ýylda studiýa üstünlikli bolan gorkunç filmleriň birnäçesini çykardy. Mysal üçin, onuň şu ýylda çykan “Günäliler” (Грешники) filmi 367 mln dollar ýygnady.
“Doga: Soňky dessurlar” Uorrenleriň hekaýatyny jemleýän bolsa-da, franşiza entek tamamlanmady. Häzir önümçilikde prikwel we serial bar.
