Indoneziýanyň Bogor şäherinde ýaşlaryň we ýetginjekleriň arasyndaky sambo boýunça Dünýä çempionatynyň jemleýji gününde Türkmenistanyň türgenleri medallarynyň sanyny sekize ýetirdiler.
Halkara Sambo Federasiýasynyň (FIAS) 58 kg çenli agram derejesinde söweş sambosynyň finalynda iki türgene-de altyn medal bermek baradaky adaty bolmadyk karary ýaryşyň iň köp ara alnyp maslahatlaşylan pursatlarynyň biri boldy. Bu agramda Türkmenistandan Alyhan Aýdogdyýew we Russiýadan Artýom Nesterow (FIAS-nyň baýdagy astynda çykyş etdi) ýeňiji boldular.
FIAS-nyň prezidenti Wasiliý Şestakow bu karary guramaçylyk ýalňyşlygy sebäpli kabul etdi: ýerli guramaçylyk komiteti final tutluşyklaryny bir sagat öňe süýşürdi, ýöne bu barada gatnaşyjylaryň ählisine habar bermändir. Netijede, Nesterow düşekçä wagtynda çyksa-da, Aýdogdyýew gijä galdy. Dörän ýagdaýlary göz öňünde tutup, federasiýa iki türgeni hem altyn medallar bilen sylaglamagy zerur hasaplady.
Ýygyndy toparyň gaznasyna bürünç medallary Mähriban Pälwanowa (59 kg çenli, sport sambosy, gyzlar) we Annamuhammet Annamuhammedow (64 kg çenli, sport sambosy, oglanlar) goşdular.
Ýatlap geçsek, mundan ozal 18 ýaşly Türkmen döwlet bedenterbiýe we sport institutynyň talyby Yslam Hemraýew (söweş sambosy, 71 kg çenli) altyn medal gazanypdy.
Umuman, Türkmenistanyň ýygyndysy iki altyn, üç kümüş we üç bürünç medal gazandy. Ýaryşa 34 ýurtdan 383 türgen gatnaşdy.
