Türkmen samboçylary ýaşlaryň we ýetginjekleriň arasyndaky dünýä çempionatynda bäş medal – bir altyn, üç kümüş we bir bürünç medal gazandylar.
Bäsleşik 3-nji oktabrdan 5-nji oktabr aralygynda Indoneziýanyň Bogor şäherinde geçdi.
Ýygyndy toparymyzyň hasabyna altyn medaly Türkmen döwlet bedenterbiýe we sport institutynyň 1-nji ýyl talyby, 18 ýaşly Yslam Hemraýew getirdi. Ol 71 kg agram derejesinde, söweş sambosy görnüşinde ýetginjekleriň (20 ýaşa çenli) arasynda dünýä çempiony boldy. Ol Gyrgyz Respublikasyndan, Ermenistandan bäsdeşlerini, finalda bolsa russiýaly (Halkara Sambo Federasiýasynyň, FIAS, baýdagy astynda çykyş eden) Gadyr Gaşimowy 8:0 hasabynda ýeňdi.
Kümüş medallary Rasul Jabraýilow (söweş sambosy, 64 kg çenli), Malikberdi Begiýew (söweş sambosy, 88 kg çenli) we Ykbal Saparowa (sport sambo, 50 kg çenli) gazandylar.
Bürünç medaly 58 kg agram derejesinde sport sambosynda ýaşlaryň (18 ýaşa çenli) arasynda Ilşat Dowranow aldy.
Bogorda geçirilen sambo boýunça ýaşlaryň arasyndaky dünýä çempionatyna dünýäniň 34 ýurdundan 383 türgen gatnaşdy. Üç günüň dowamynda olar 16-18 ýaşly oglanlaryň we gyzlaryň, hem-de 18-20 ýaşly ýetginjekleriň we gyz ýetginjekleriň arasynda sport we söweş sambosynda 37 medal toplumyny oýnadylar.
