Toyota kompaniýasy 2026-njy ýylda ýaryş ýollaryna çykjak döwrebaplaşdyrylan GR010 ýaryş awtoulagynyň ilkinji suratlaryny görkezdi. Ýapon kompaniýasynyň esasy maksady – Ferrari-niň topary ýaryş ýoluna gaýdyp geleninden soň, “Le Man-yň 24 sagady” ýaryşynda, ýitirilen zatlaryň öwezini dolmak bilen, öňdebaryjy ornuny gaýtadan dikeltmek.
Çempionatyň berk düzgünleri sebäpli Toyota-nyň inženerleri 680 at güýji bolan gibrid awtoulagyň aerodinamikasyny gowulandyrmaga ünsi jemlediler. Neşir edilen suratlarda, esasan, awtoulagyň umumy sudury we käbir bölekleri - yzky anti ganatyň sudury, öň splitter we bölekleýin Toyota önümçilik awtoulaglarynyň dizaýnyndan ylhamlanan täze yşyklandyryş görünýär.
Toyota-nyň Ýewropadaky Gazoo Racing-iň bölüminiň ýolbaşçylaryndan biri Kazuki Nakadzimanyň sözlerine görä, GR010 Evolution diýlip atlandyrylýan ýaryş ulagynyň döwrebaplaşdyrylan görnüşi 2026-njy ýylyň möwsüminde ýaryşa doly goşulmaga taýýarlanýar. Ol toparyň Le Manda ýeňşini gaýtaryp almagy maksat edinýändigini aýtdy.
Toyota 2018-nji ýyldan 2022-nji ýyla çenli yzly-yzyna bäş marafonda ýeňiş gazanyp, bu ajaýyp ýaryşda öňdeligi eýeläp gelipdi. Ýeňişleriň yzy 2023-nji ýylda Ferrari çydamlylyk ýaryşyna gaýdyp gelip, yzly-yzyna üç gezek ýeňiji bolanda üzülipdi.
GR010 Evolution-yň ilkinji köpçülikleýin synaglary oktýabr aýynyň başynda Ýewropanyň ýaryş ýollarynda geçer diýlip garaşylýar. Geljek möwsümde Toyota Aston Martin, Porsche, BMW we Cadillac awtoulaglary bilen bäsleşer, 2027-nji ýylda bolsa Genesis-yň, MakLaren-iň we Ford-uň toparlary ýaryşa goşular.
