3-nji oktýabrda SpaceX kompaniýasy şu ýylda 125-nji gezek Falcon 9 raketasyny uçuryp, Ýere golaý orbita 28 sany Starlink internet hemrasyndan ybarat toplumy iberdi.
Uçuş ABŞ-nyň gündogar wagty bilen 10:06-da (Aşgabat wagty bilen 19:06) Kaliforniýadaky Wandenberg kosmos güýçleri bazasyndan amala aşyryldy. Uçuşdan bir sagatdan soň ikinji basgançak hemralary orbita çykardy, birinji basgançak bolsa sekiz minutdan soň Ýuwaş ummandaky SpaceX-iň Of Course I Still Love You deňiz platformasynda üstünlikli gondy. Bu raketa üçin häzirki uçuş ikinji boldy, birinji gezek hem ol Starlink hemralaryny orbita çykarmak üçin ulanylypdy.
Space.com portalynyň maglumatlaryna görä, 2025-nji ýylda Falcon 9-yň uçuşlarynyň 70%-den gowragy Starlink hemralar toparyny giňeltmek bilen baglanyşykly boldy. Ýewropanyň kosmos agentligine görä, häzir orbitada 12 500 töweregi hereket edýän hemra bolup, olardan 8500-den gowragy Starlink enjamlarydyr.
Şu ýyl SpaceX dünýäniň ähli ýurtlaryny bilelikde alanyňdan hem köp raketa uçurdy. Dünýäde jemi 223 üstünlikli uçuş boldy: uçuş sany boýunça ABŞ-dan soň Hytaý (58) we Russiýa (13) gelýär.
