Karl Faberženiň “Gyş ýumurtgasy” – imperator Nikolaý II-niň ejesi Mariýa Fýodorowna pasha sowgady ýene auksiona çykaryldy. Ozal ol auksionda 2002-nji ýylda 9,58 mln dollara, 1994-nji ýylda bolsa 5,58 mln dollara satylypdy diýip, Forbes ýazýar.
Ýumurtga özüniň üýtgeşik dizaýny bilen tapawutlanýar. Onuň üstünde Faberženiň neberesi bilen baglanyşykly ussatlar bilen bilelikde ýaş zergär Alma Pil işledi.
Ýumurtganyň korpusy dag hrustalyndan – işlemesi örän kyn bolan materialdan ýasaldy. Onuň gapdalynda gülgüne göwherler bilen bezelen anemonly platina sebedi bar. Her gül ak kwarsyň böleginden, baldaklar we tyçinkalar bolsa altyn simden ýasaldy.
Ýumurtganyň soňky eýeleri katarly kolleksioner, şeýh Saud bin Muhammed Al Taniniň mirasdüşerleridir. Olar ony Christie’s auksion öýi arkaly satuwa çykardy. Söwda 2-nji dekabrda Londonda meýilleşdirilýär. Ýumurtganyň başlangyç bahasy entek yglan edilmedi.
