1-2-nji oktýabrda Sotheby's Abu-Dabide ilkinji Ýakyn Gündogaryň şekillendiriş sungaty sergisini geçirdi. Ol görkezilen eserleriň bahasy boýunça - 150 million dollar töweregi - rekord goýdy. Sergi Saadiýat adasyndaky Bassam Freýh sungat merkezinde geçirildi.
Sergä gelenler Winsent Wan Goguň, Pol Gogeniň, Frida Kalonyň, Rene Magrittiň, Edward Munkyň we Kamil Pissarronyň kartinalaryny synlap bildiler. Ähli eserler iri hususy kolleksiýalardan getirildi.
Şolaryň arasynda Edward Munkyň 20 million dollardan gowrak bahasy bolan “Keramatly Hansyň gijesiniň öňüsyrasynda” (1901–1903) eseri bar. Ondan öň, ol Leonard Lauderiň ýygyndysyna degişlidi. Wan Goguň we Gogeniň kartinalary Sindiniň we Jeý Pritskeriň ýygyndysyndan, Rene Magrittiň “Ýitirilen çapyksuwar” diýen işi (1942) Mettýu bilen we Karolin Buksbaumyň ýygyndysyndan alyndy.
Serginiň esasy eksponaty Frida Kalonyň 40-60 million dollar bahasy bolan “Uky (Ýatalga)” (1940) eseri boldy.
Bu sebit üçin özboluşly sergi boldy: sergilenen kartinalaryň hiç biri ozal Ýakyn Gündogarda görkezilmedik, üç eser bolsa 50 ýyldan gowrak wagt bäri köpçülige asla görkezilmändir. Abu-Dabide geçirilen sergiden soň kolleksiýa Londona ugrar, şondan soň noýabr aýynda sýurrealistik sungat auksiony geçiriljek Parižde we Nýu-Ýorkda hem görkeziler.
