UEFA-nyň Çempionlar ligasynda umumy tapgyryň ikinji oýunlary tamamlandy.
Agşamyň esasy duşuşygy Barselonada geçirildi, bu ýerde katalon kluby ýaryşyň häzirki çempiony “Pari Sen-Žermeni” kabul etdi.
“Barselona” eýýäm ilkinji minutlarda hasaby açyp bilerdi, ýöne parižlileriň goragçysy Ilýa Zabarnyý Ferran Torresiň urgusyndan soň topuň derwezä girmegine mümkinçilik bermedi. Ýöne Ferran 19-njy minutda, her niçigem bolsa, öz hasabyna gol ýazdy. Myhmanlar arakesmä çenli hasaby deňläp ýetişdi: Senni Maýulýu gol geçirdi. Oýnuň ikinji ýarymynda “Barselona” birnäçe mümkinçiligi sypdyrdy. Pariž kluby bolsa, tersine, oýnuň ahyrynda pursatdan peýdalandy – meýdança çykan Gonsalu Ramuşu 90-njy minutda ýeňiş goluny girizdi. Oňa topy Aşraf Hakimi geçirdi.
Beýleki oýunlara gysgaça syn:
- “Monako” – “Mançester Siti” 2:2. Erling Holand ÇL-däki 50-nji oýnunda iki gol geçirdi, ýöne Erik Daýeriň 90-njy minutdaky penalti urgusy ýer eýelerini utulmakdan halas etdi.
- “Wilýarreal” – “Ýuwentus” 2:2. “Ýuwentusyň” öňki goragçysy Renatu Weýga ispan klubunyň utulmagyna ýol bermedi – oýnuň ahyrynda ol öňki klubuna garşy kelle bilen gol salyp, ýer eýeleri üçin hasaby deňledi.
- “Karabah” – “Kopengagen” 2:0. Oýunda ýeňiş gollaryny Abdella Zubir we Emmanuel Addaý geçirdi. Azerbaýjan kluby iki tapgyrdan soň iň köp utugy gazandy.
- “Ýunion” – “Nýukasl” 0:4. Entoni Gordon penaltiden iki gol geçirdi, şeýle-de Nik Woltemade we Harwi Barns öz hasaplaryna gol ýazdy.
- “Arsenal” – “Olimpiakos” 2:0. Gabriel Martinelli bilen Bukaýo Sakanyň gollary “Arsenala” ýeňiş getirdi.
- “Baýer” Lewerkuzen – “PSW” Eýndhowen 1:1. Toparlar täsirli oýun görkezdi. Kristian Kofane Çempionlar ligasynda “Baýeriň” iň ýaş gol awtory boldy, ýöne “PSW” Ismael Saýbariniň urgusy bilen derrew jogap gaýtardy.
- “Borussiýa” Dortmund – “Atletik” Bilbao 4:1. Swenssonyň, Çukwuemekiniň, Girassiniň we Brandtyň gollary nemes klubuna ýeňşi üpjün etdi.
- “Napoli” – “Sporting” 2:1. “MÝ-den” kärendesine alnan Rasmus Heýlunnyň iki goly “Napoliniň” hasabyna üç utuk ýazdy, iki ýagdaýda-da oňa Kewin de Brýoýne kömek etdi. Oýnuň ahyrynda topary derwezeban Wanýa Milinkowiç-Sawiç halas etdi.
