SpaceX aerokosmos kompaniýasy 13-nji oktýabrda Super Heavy tizleşdirijisi bilen bilelikde Starship kosmos gämisiniň 11-nji synag uçuşyny geçirmegi meýilleşdirýär.
“Starship-iň onunjy uçuş synagy dünýäde ilkinji dolulygyna köp gezeklik raketa göterijisini döretmekde möhüm ädim boldy. Starship gämisiniň on birinji uçuş synagy 13-nji oktýabra, duşenbe gününe meýilleşdirilýär” – diýlip, kompaniýanyň X sosial ulgamyndaky habarynda aýdylýar.
Uçuş penjiresi ýerli wagt bilen 18:15-de (Aşgabat wagty bilen 14-nji oktýabr 04:15) açylar. Uçuşa göni ýaýlymda SpaceX-iň YouTube kanalynda tomaşa edip bolar; ýaýlym uçuşdan ýarym sagat öň başlar.
Synag wagtynda kompaniýa täze tizleşdirijileri döretmek üçin maglumat ýygnamagy, ýylylykdan goraýan ekrany barlamagy we uçuş meýdançasyna gaýdyp gelmek üçin zerur hereketleri synamagy meýilleşdirýär. Super Heavy tizleşdirijisi 24 sany Raptor hereketlendirijisi bilen enjamlaşdyryldy. Synag wagty hünärmenler Meksikan aýlagyna gonuşda hereketlendirijileriň täze iş usulyny barlar. Ilkibaşda 13 hereketlendiriji işlär, soňra olaryň sany bäşe, ondan soň üçe çenli azaldylar.
Raketanyň ikinji basgançagy orbita Starlink hemralarynyň sekiz maketini çykaryp, kosmosda hereketlendirijilerini işletmäge çalyşmaly. Şeýle-de, inženerler korpusyň atmosfera girişde ýokary temperaturalara çydamlylygyny barlamak üçin gorag plitkalarynyň bir bölegini aýrar. Şondan soň Starship aýlanmak hereketini ýerine ýetirer we gönükdirme ulgamyny barlar. Synag Hindi ummanynda gonmak bilen tamamlanar.
Starship-iň geçenki synag uçuşy 27-nji awgustda boldy. Uçuşdan birnäçe minutdan soň gämi tizleşdirijiden aýryldy, tizleşdiriji bolsa hereketlendirijisini işledip, gonmaga taýýarlandy. Starship-iň özi belentlige çykmagyny dowam etdirdi we 20 minutdan soň Starlink telekommunikasion hemralarynyň maketlerini kosmosda ýerleşdirmäge girişdi.
