OpenAI kompaniýasy ChatGPT üçin ene-ata gözegçiligi funksiýasynyň işläp başlandygyny habar berdi. 2025-nji ýylyň 29-njy sentýabryndan hyzmat sazlamak üçin aýratyn sahypa bilen bilelikde web-wersiýany we mobil goşundysyny ulanyjylar üçin elýeterli boldy diýip, Bloomberg belleýär.
Indi ene-atalar öz akkuntlaryny ýetginjegiň akkaunty bilen baglap, çäklendirmeleri sazlap biler. Ýöne muny ýetginjegiň özüniň razylygy bolmazdan etmek mümkin däldir – taraplaryň biri çakylyk ibermeli, beýlekisi ony kabul etmeli.
Eger ýetginjek öz akkauntyny ene-ata gözegçiliginden aýyrmak islese, OpenAI bu barada ene-atalara duýdurar. Şol bir wagtyň özünde, ene-atalar çaganyň ýazyşýan gürrüňlerine elýeterli bolup bilmez. Kompaniýa çatdan bölekleri diňe aýratyn ýagdaýlarda, mysal üçin, OpenAI-iň hünärmenleri howpuň bardygyny ýüze çykarsa, ene-atalar bilen paýlaşyp biler.
Eger çat-bot ýetginjegiň çökgünlik ýagdaýyndadygyny aňsa, kompaniýanyň işgärleri ene-atalara bu barada gyssagly habar iberer.
Akkauntlaryň arasynda baglanyşyk gurlandan soň, ene-atalar ýetginjekleriň käbir kontentlere we şekil döretmek ýa-da redaktirlemek mümkinçiligine elýeterliligini çäklendirip, “asuda wagty” kesgitläp ýa-da ChatGPT-ni ulanyp bolmajak takyk wagty saýlap, ses režimini we ýady öçürip, şeýle-de bu gürrüňleri OpenAI modellerini okatmak üçin ulanyp boljakdygyny ýa-da ýokdugyny çözüp biler.
