RTR Vehicles awtobezeg ussahanasy Ford Mustang-yň binýadynda taýýarlan Spec 5 täze taslamasyny hödürledi. 5 litrlik kompressorly V8 indi 882 at güýjüni ösdürýär. Bu bolsa ony zawodyň iň güýçli modeli bolan 826 at güýjündäki Mustang GTD-den güýçli edýär, üstesine-de bahasy has arzan.
Taslama üçin esasan Mustang GT Performance bukjasy we Recaro oturgyçlary bilen gelýän standart model ulanylýar. Korpusyň köp bölegi kompozit materiallardan ýasalyp, giňeldilen ganatlar we goşmaça howa girelgeleri ýerleşdirilen. Bu bolsa giňeldilen teker ýerligini ýerleşdirmäge mümkinçilik berýär.
Hereketlendiriji 6 basgançakly mehaniki ýa-da 10 basgançakly awtomatiki geçiriji bilen işläp bilýär. Agramy ýeňilledilen 20 dýuýmlyk diskleriň aňyrsynda «Brembo» tormozlary ýerleşdirilen: öňde alty, yzda dört porşenli.
Döredilen toplumyň düzümine sazlap bolýan asma ulgam girýär — ony şäherde sürmek, trek üçin ýa-da eýesiniň şahsy islegine görä düzetmek mümkin. Şeýle hem maşynda täsirli «ponçikler» (duran ýerinde pyrlap, aýlaw etmek) üçin ýörite drift-tormozy bar.
Ýylda takmynan 50 sany Mustang RTR Spec 5 öndürmek meýilleşdirilýär. Başlangyç bahasy 160 müň dollar. Sargyt eden müşderiler tekerleriň görnüşini we korpusyň reňkini özleri saýlap bilerler.
