Hytaýyň Beijing SAWES Energy Technology kompaniýasy ýurduň ylmy institutlary bilen bilelikde S1500 ýel generatorynyň ilkinji synaglaryny geçirdi. Ol Hytaýyň demirgazyk-günbatarynda, Sinszýandaky Hami şäherinde asmana galdy diýip, South China Morning Post habar berýär.
Täze gurluş halka görnüşli ganaty bolan ägirt aerostata meňzeýär. Onuň ululygy hem haýran galdyrýar – 60 х 40 х 40 metr. Ol gaz bilen doldurylan ballony we ýel akymyny gurluşyň içine gönükdirýän ägirt ganaty birleşdirýär.
Korpusda her biriniň kuwwaty 100 kilowatt bolan 12 turbogenerator ýerleşdirildi. Ýel halka bilen tutulýar, tizligi artdyrylýar we generatora düşüp, elektrik energiýasyna öwrülýär. Alnan energiýa aerostaty ýerüsti stansiýa bilen birleşdirýän kabel arkaly ýere iberilýär.
Synaglar çöllük ýerde geçirildi. Inženerler desganyň güýçli ýele we basyşa çydamlylygyny, şeýle-de ençeme gezek uçurmaga durnuklylygyny barlady. S1500 1500 metre çenli belentlikde işlemek üçin niýetlenendir.
Işläp düzüjileriň pikiriçe, şeýle uçýan ýel generatorlary uzakdaky ilatly nokatlar, ylmy stansiýalar, obserwatoriýalar ýa-da meýdan synaglary üçin awtonom energiýa çeşmesi bolup biler.
