Apple Siri ses kömekçisiniň täzelenen görnüşini barlamak üçin täze Veritas programmasyny işläp düzýär. Bloomberg-iň žurnalisti Mark Gurmanyň habar bermegine görä, bu programma häzirlikçe gizlin saklanýar we diňe kompaniýanyň öz içinde ulanylýar.
Veritas Apple-iň işgärlerine şahsy maglumatlar, mysal üçin, e-poçta ýa-da aýdym-saz sanawlary gözlenende, şeýle hem surat redaktirlemesini goşmak bilen, programmalaryň içindäki hereketler ýerine ýetirilende geljekki Siriniň öndürijiligini barlamaga kömek edýär. Programmanyň ady latyn dilinden terjime edilende "hakykat" diýmegi aňladýar.
Kompaniýanyň meýilnamalaryna görä, giňeldilen AI aýratynlyklary bolan Siri-niň kämilleşdirilen görnüşi geljek ýylyň mart aýynda satuwa çykarylar. Bu Apple üçin AI bazaryndaky bäsdeşleriniň yzyndan ýetmek synanyşygynda möhüm tapgyr bolar. Ozal käbir funksiýalarynyň durnuksyzdygy sebäpli işe girizmek yza süýşürilipdi.
Veritas ChatGPT ýaly çat-botlara meňzeýär, ol dürli temalarda söhbetdeşlik guramaga mümkinçilik berýär, öňki söhbetleri ýatda saklaýar we olara täzeden gaýdyp gelip bilýär. Onuň esasy maksady öz işläp taýýarlan ýa-da üçünji taraplar tarapyndan işlenip düzülen uly dil modellerini ulanýan Linwood platformasyny synagdan geçirmekden ybarat.
Şeýle hem, Apple Siriniň wizual görnüşini täzelemegi we akylly öý enjamlaryna AI funksiýalaryny goşmagy meýilleşdirýär. Çeşmäniň bellemegine görä, kompaniýa bu taslamalara uly umyt baglaýar.
