“Doga 4: Soňky dessurlar” (Заклятие 4: Последний обряд) filmi 2025-nji ýylyň iň girdejili horrory boldy. MovieWeb portalynyň maglumatlaryna görä, ol üç uikendiň dowamynda prokatda 400 mln dollar ýygnady we öz kassa ýygymyny artdyrmagy dowam edýär.
Bilermenleriň çaklamalary boýunça, film has köp gazanyp biler. Onuň ýakyn bäsdeşi 366,7 mln dollar ýygnan “Günäliler” (Грешники) horrory hasaplanýar. Reýtingiň üçünji ornunda 313 mln dollar bilen “Ahyrky nokat: Gan baglanyşygy” (Пункт назначения: Кровные узы) ýerleşýär. “Ýaraglar” (Орудия) häzirlikçe 263,4 mln dollar netije bilen bu filmlerden yza galýar.
MovieWeb “Günäliler” bilen “Ýaraglaryň” uly franşizalardan we belli kitap wakalaryndan daşary iň üstünlikli horror filmleri bolup biljekdigini belleýär. Neşiriň pikiriçe, bu, esasan, köne filmleriň täze wersiýalarynyň we sikwelleriň üstünlikli bolýandygyny göz öňünde tutsaň, möhüm netijedir.
“Doga 4: Soňky dessurlar” franşizanyň sýužetini resmi taýdan tamamlaýar, ýöne waka köp bölümli görnüşde dowam eder.
Portalyň awtorlary horror žanryndaky filmleriň, adatça, üstünliklidigini, ýöne supergahrymanlyk filmleriniň ýa-da animasiýalaryň kassa görkezijilerine ýetmeýändigini belleýär. “Haçan-da elhençlik filmi 300 mln dollardan geçende, bu diýseň tolgundyryjy” – diýip, olar ýazýar.
“Haçan-da bir film çykanda, bu elhençlik žanryna umyt berýär. Haçan-da olar köp bolanda, bu studiýalara elhençlik filmlerine islegiň ýokarydygyny we olara ýokary baha bermelidigini görkezýär” – diýip, MovieWeb-iň awtorlary belledi.
