Bentley kompaniýasy Flying Spur sedanynda ilkinji gezek ombre reňkleýiş tehnologiýasyny ulandy. Şeýle tehnika iki reňkiň biri-birine akgynly geçişini göz öňünde tutýar - awtoulagyň öň tarapy mawy Topaz, arka tarapy dok gök Windsor reňki bilen boýalýar.
Reňklemek prosesi ýokary takyklygy talap edýär we iki tejribeli reňkleýjiniň takmynan 60 sagat wagtyny alýar. Ilki bilen reňkler aýry-aýrylykda awtoulagyň öň we yz tarapyna sepilýär, soňra oňa ton berilýär hem-de geçiş endigan we simmetrik bolar ýaly ton tapgyr-tapgyr sepilýär. Şol bir wagtyň özünde kölegeler üçünji reňk peýda bolmaz ýaly edip garyşdyrylýar.
Bentley ombre tehnikasynyň diňe üç kombinasiýada bardygyny belläp geçdi: Topaz-Windsor, Sunburst Gold-Orange Flame we Tungsten-Onyx. Reňkleýji ussalara geçişiň endigan bolmagy üçin spreý sepilende her reňkiň özüni alyp barşyna üns bermek möhümdir.
Kompaniýa bu boýag işiniň aýratynlygyny nygtaýar. Onuň bahasy 48 000 funt sterlingden başlaýar, bu takmynan täze BMW 5 Series-iň ýa-da Mersedes-Benz E-Classyň bahasy bilen deňdir.
Ombre tehnikasy ilkinji gezek şu ýylyň awgust aýynda Monterey Car Week-de Continental GT kupesinde görkezilipdi.
