Beýik Britaniýanyň meşhur ýokary okuw jaýlarynyň biri hasaplanýan Kembrij hem-de Oksford ilkinji gezek The Times and Sunday Times Good University Guide 2026 reýtinginiň ilkinji üçlügine girip bilmedi. Bu sanaw 32 ýyl bäri yzygiderli çap edilip gelinýär we ýurduň ýokary bilimiň derejesini kesgitlemekde möhüm görkeziji hasaplanýar.
Birinji orny ikinji ýyl yzly-yzyna Londonyň Ykdysadyýet Mekdebi (LSE) eýeleýär. Ikinji orny Sent-Endrýus uniwersiteti, üçünji orny bolsa Darem uniwersiteti eýeledi. Kembrij dördünji, Oksford bolsa bäşinji orunda ýerleşdi.
Geçen ýylky görkezijiler başgaça bolupdy: Oksford üçünji, Kembrij bolsa dördünji orny eýeläpdi. Şeýlelikde 2025-nji ýyl ilkinji gezek ýurduň iň köne uniwersitetleriniň ikisiniň hem The Times-nyň ilkinji üçlüginden çykarylan ýyly boldy.
Şol bir wagtyň özünde, başga bir abraýly sanaw — The Guardian University Guide 2026 geçen hepde çap edilende, düýpgöter başgaça netije görkezdi: onda Oksford birinji, Kembrij bolsa üçünji orny eýeledi.
Bu tapawutlar sanawlaryň taýýarlanyş usulyna we baha bermegiň ölçeglerine baglydygyny görkezýär. The Times esasan uçurymlaryň işe ýerleşmegi we okuw sapagynyň hiline üns berse, The Guardian talyplaryň kanagatlanmagyna hem-de akademiki görkezijilere has köp ähmiýet berýär.
