Italiýanyň milli futbol ýygyndysynyň derwezebany Janluiji Donnarumma France Football žurnaly tarapyndan möwsümiň iň gowy derwezebany hökmünde Lew Ýaşin adyndaky baýraga mynasyp boldy.
Baýragy oňa watandaşy – Italiýanyň milli ýygyndysynyň öňki derwezebany Janluiji Buffon gowşurdy.
Geçen möwsümde Donnarumma “Pari Sen-Žermeniň” düzüminde Çempionlar ligasynyň, Fransiýanyň çempionatynyň we Kubogynyň ýeňijisi boldy, Klublaýyn dünýä çempionatynyň finalyna çykdy. Onuň üçin bu baýrak eýýäm ikinjidir. Birinji gezek ol Lew Ýaşin baýragyny 2021-nji ýylda alypdy. Sentýabrda italiýaly futbolçy Angliýanyň “Mançester Siti” klubuna geçdi.
Donnarummadan başga-da baýrak üçin şular dalaş etdi: Alisson (Braziliýa, “Liwerpul”), Ýassin Bunu (Marokko, “Al-Hilýal”), Lýuka Şewalýe (Fransiýa, ozal “Lillde” oýnaýardy), Tibo Kurtua (Belgiýa, “Real”), Emiliano Martines (Argentina, “Aston Willa”), Ýan Oblak (Sloweniýa, “Atletiko”), Dawid Raýýa (Ispaniýa, “Arsenal”), Mats Sels (Belgiýa, “Nottingem Forest”) we Ýann Zommer (Şweýsariýa, “Inter”).
Zenanlaryň arasynda baýragy Angliýanyň milli futbol ýygyndysynyň derwezebany Hanna Hempton aldy.
Lew Ýaşin adyndaky baýrak 2019-njy ýylda esaslandyryldy. Martines (2023, 2024), Alisson (2019) we Kurtua (2022) bu baýragyň eýeleri boldy. Ýaşin 1956-njy ýylyň Olimpiýa çempiony we 1960-njy ýylyň Ýewropa çempiony, FIFA boýunça XX asyryň iň gowy derwezebany, şeýle-de derwezebanlaryň arasynda “Altyn topuň” ýeke-täk eýesidir (1963-nji ýylda).
