“Pari Sen-Žermen” klubunyň fransiýaly futbolçysy Usman Dembele UEFA we L’Equipe bilen bilelikde France Football žurnaly tarapyndan möwsümiň iň gowy futbolçysyna berilýän “Altyn top” baýragynyň eýesi boldy.
Baýragyň gowşurylyş dabarasy duşenbe güni Pariždäki Şatle teatrynda geçirildi. Baýragy 2005-nji ýylyň “Altyn topunyň” eýesi, braziliýaly Ronaldinýo gowşurdy. Dembele baýragy alandan soň, gözýaşyny saklap bilmedi.
100 ýurtdan žurnalistleriň ses bermeginde ikinji orny “Barselonanyň ispaniýaly futbolçysy Lamin Ýamal, üçünji orny “PSŽ-den” Witinýa eýeledi.
Şeýle-de, iň gowularyň ilkinji onlugyna şular girdi:
4. Mohamed Salah (Müsür, “Liwerpul”);
5. Rafinýa (Braziliýa, “Barselona”);
6. Aşraf Hakimi (Marokko, “PSŽ”);
7. Kilian Mbappe (Fransiýa, “Real”);
8. Koul Palmer (Angliýa, “Çelsi”);
9. Janluiji Donnarumma (Italiýa, “PSŽ”);
10. Nunu Mendeş (Portugaliýa, “PSŽ”).
Usman Dembele fransuz futbolynyň taryhynda “Altyn top” baýragyny alan altynjy futbolçy boldy. Ozal baýragy fransiýaly futbolçylaryň arasynda Raýmon Kopa (Madridiň “Realy”), Mişel Platini (Turiniň “Ýuwentusy” / üç gezek), Žan-Pýer Papen (Marsel “Olimpik”), Zinedin Zidan (Turiniň “Ýuwentusy”) we Karim Benzema (Madridiň “Realy”) alypdy.
Şeýlelikde, fransuz futbolçylary “Altyn top” alan oýunçylaryň sany boýunça Italiýadan we Germaniýadan öňe geçip, täze rekord goýdy.
Zenanlaryň arasynda “Altyn topy” yzygider üçünji ýyl “Barselonanyň” ispaniýaly futbolçysy Aýtana Bonmati aldy. Oňa baýragy klubuň we Ispaniýanyň milli ýygyndysynyň öňki ýarymgoragçysy Andres Inýesta gowşurdy.
“Altyn top” 1956-njy ýylda France Football tarapyndan Ýewropada ýylyň iň gowy futbolçysy üçin baýrak hökmünde döredildi.
