Mercedes-Benz Germaniýanyň demirgazygynda Papenburg şäherindäki synag ýolunyň çäginde hususy ýel elektrostansiýasynyň gurluşygyna başlady.
2027-nji ýyla çenli, takmynan, 800 gektarlyk ýerde umumy kuwwaty 140 megawatt bolan 20 ýel turbinasyny gurnamak meýilleşdirilýär. Hasaplamalara görä, bu Germaniýada Mercedes-Benz Group AG-yň bir ýyllyk energiýa zerurlyklarynyň 20%-ini üpjün etmek üçin ýeterlikdir.
Taslama UKA (Umweltgerechte Kraftanlagen GmbH Co. KG) kompaniýasy bilen bilelikde durmuşa geçirilýär. Onuň bilen elektrik energiýasyny ýola goýmak barada 25 ýyllyk şertnama baglaşyldy.
Turbinalar bilen Nordex nemes kompaniýasy üpjün eder, 164 metrlik diňler üçin beton binýatlaryny we elementleri bolsa Max Bögl Wind AG taýýarlar.
Mercedes-Benz Group AG-yň müdirler geňeşiniň önümçilige jogap berýän agzasy Ýorg Burser täze ýel elektrostansiýasynyň kompaniýanyň durnukly ösüş strategiýasynyň bir bölegi boljakdygyny we daşky gurşawa hem ykdysadyýete peýda getirjekdigini belledi. Papenburgdaky taslama Germaniýada gurulýan umumy kuwwaty 1,5 gigawattdan ýokary bolan desgalaryň arasynda iň möhümi hasaplanýar.
Mercedes-Benz 2022-nji ýyldan bäri önümçilik meýdançalarynyň gönüden-göni atmosfera kömürturşy gazyny zyňman işleýändigini ýatlap geçýär. 2030-njy ýyla çenli kompaniýa önümçilikde sarp edilýän energiýanyň 70%-den gowragyny gaýtadan dikeldilýän çeşmelerden almagy, uzak möhletli geljekde bolsa dünýädäki ähli zawodlarynda doly “ýaşyl” energiýa geçmegi göz öňünde tutýar.
