20-nji sentýabrda Türkmen döwlet bedenterbiýe we sport institutynda «Sport parahatçylygyň we ynanyşmagyň girewidir» atly milli forum geçirildi. Forum Türkmenistanyň Garaşsyzlygynyň şanly 34 ýyllyk baýramy we Talyplar sportunyň halkara güni mynasybetli guraldy.
Forumyň işine ýurdumyzyň öňdebaryjy sport hünärmenleri bilen birlikde Türkmenistanyň Magtymguly adyndaky Ýaşlar guramasynyň Merkezi Geňeşiniň işjeň agzalary, ýokary okuw mekdebimiziň professor-mugallymlary we talyp ýaşlar gatnaşdylar. Fransiýayň Pariž şäherinden ÝUNESKO-nyň Sport bölüminiň başlygy, Bedenterbiýe we sport boýunça hökümetara komitetiniň (CIGEPS) sekretary jenap Filip Müller-Wirt wideoaragatnaşyk ulgamy arkaly milli foruma gatnaşyjylara gutlag sözi bilen ýüzlenip, talyplar sportunyň dost-doganlygy we ynanyşmagy pugtalandyrýandygyny belledi.
Forumyň barşynda şeýle hem sport klublarynyň işini kämilleşdirmekde häzirki zaman tejribeleri paýlaşyldy. Talyplar sportuny we sagdyn durmuş ýörelgesini ylmy esasda ösdürmegiň ähmiýeti bellenildi.
Umumy mejlis tamamlanandan soň, milli forum öz işini 60-dan gowrak çykyşlar girizilen bölümçelerde dowam etdi.
Talyplar sportunyň halkara güni (International Day of University Sport — IDUS) ilkinji gezek 2015-nji ýylda ÝUNESKO-nyň Baş konferensiýasynyň karary bilen yglan edildi. Bu teklip ýokary okuw mekdeplerindäki sport hereketleriniň halkara merkezi bolan – Halkara talyp sporty federasiýasy (FISU) tarapyndan öňe sürlüp, ilkinji gezek resmi derejede 2016-njy ýylda bellenildi. Häzirki wagtda dünýäniň ýüzlerçe ýurdunda bu gün dürli çäreler bilen giňden bellenilýär.
