Hytaýda bir çapar tötänden doňduryjyda gulplanyp galan bir zenany halas etdi. Zenan minnetdarlyk hökmünde oňa öz kompaniýasyndan paý berdi diýip, China Morning Post habar berýär.
Hunan welaýatyndan Çen atly bir zenanyň logistika kompaniýasy bolupdyr. 31-nji awgustda agşam ol ýeke özi sowadyjy ammarda azyklary sortlapdyr. Düzgün boýunça şeýle işler azyndan iki işgär bolup ýerine ýetirilmeli, sebäbi kameranyň gapylary içinden açyp bolmaýan görnüşde gurlan eken. Çen işini tamamlan badyna gapy jarka ýapylypdyr, ätiýaçlyk açyjy düwme bolsa näsaz bolup çykýar.
Kameranyň temperaturasy minus 20 dereje eken. Zenanyň egnine geýen eşigi ýeňil bolup, ýanynda telefony hem ýok eken. Ilki ol gygyryp kömege çagyrypdyr, ýöne ony eşiden bolmandyr: ammar barmasy kyn ýerde ýerleşipdir. Soňra Çen börekli guty bilen gapyny kakyp başlapdyr we tizden ysgyndan gaçyp ýadapdyr.
Ahyrynda onuň ysgynsyz gygyrýan sesini çapar Lýu Sýuý eşidipdir we zenana ol ýerden çykmaga kömek edipdir. Ol kameranyň içinde 20 minut töweregi wagt bolupdyr. Onuň sözlerine görä, baryndan beter ol çagalaryny alada edipdir: biri orta mekdepde okaýar, beýlekisi bäş ýaşynda eken. Özüne gelmek üçin oňa iki sagat gerek bolupdyr.
Soňra Çen halasgärine minnetdarlyk bildirip, oňa gyzyl wympel, gül, iýmit, pul we iň esasysy - kompaniýasynda paý berdi. Çen: "Hiç kim meni eşitmedik bolsa, megerem doňup galardym" -diýdi.
