2024-nji ýylyň jemleri boýunça Türkmenistanyň ykdysadyýetine gönükdirilen maýa goýumlaryň möçberi 12,1 milliard dollardan geçdi. Bu bolsa 2023-nji ýyl bilen deňeşdirilende 9% köpdür diýip, maliýe we ykdysadyýet ministri M.Astanagulow Awazada geçirilen TIF 2025 forumynda habar berdi.
Onuň aýtmagyna görä, geçen ýylda daşary ýurt maýa goýumlarynyň paýy umumy möçberden 11,6%-e ýetdi we 2023-nji ýyl bilen deňeşdirilende 1,4% artdy. Jemi daşary ýurt maýa goýumlary 5 milliard manada golaý boldy we 25% ösüş gazandy.
Ministr maýa goýum işjeňliginiň ýokarlanmagyna hereket edýän fiskal syýasatyň ýardam edýändigini belledi. Salgyt ulgamynda ileri tutulýan pudaklar üçin uly ýeňillikler göz öňünde tutulýar, ýurtdaky salgyt agramy bolsa soňky 20 ýylyň dowamynda durnukly bolup galýar.
Türkmenistanyň maýa goýumlary üçin iň ileri tutulýan ugurlary nebitgaz pudagy, nebit-gazhimiýa, energetika, gurluşyk we senagat toplumy bolmagynda galýar.
