OpenAI kompaniýasy "ChatGPT-niň çagalar interfeýsiniň" üstünde işleýär we ulanyjylary ýaşy boýunça awtomatiki tertipleşdirmegi meýilleşdirýär.
Munuň üçin ýaşy çaklamak tehnologiýasy ulanylar. Ulgam ulanyjynyň ýaşyny takyk kesgitläp bilmese, ulanyjy 18 ýaşdan kiçi wersiýa ugrukdyrylar. ChatGPT-i ulanmak üçin iň pes ýaş 13 bolup galar.
OpenAI-yň baş direktory Sem Altman kompaniýanyň ýetginjekleriň howpsuzlygyny erkinlikden we gizlinlikden ileri tutýandygyny, sebäbi tehnologiýa kämillik ýaşyna ýetmedikleriň goralmagyny talap edýändigini aýtdy.
Täze interfeýs ene-atanyň gatnaşmagyny talap edýär: olar akkauntlaryny ýetginjekleriň akkauntlary bilen baglanyşdyrmaly. Bu ChatGPT-niň funksiýalaryny çäklendirmäge, dartgynly ýagdaýyň alamatlary barada habarnamalary almaga we hyzmatdan peýdalanmaly däl wagty kesgitlemäge mümkinçilik berer.
Bu bildiriş Waşingtonda ýetginjekler üçin çat-botlaryň howply taraplary barada dowam edýän diňlenişikleriň, şeýle hem OpenAI we Meta, Google, xAI, Snap we Character.AI ýaly beýleki tehnologiýa kompaniýalaryndan maglumat soraýan ABŞ-nyň Federal Söwda Geňeşiniň geçiren derňewi wagtynda ýaýradyldy.
Bu pudakda eýýäm YouTube Kids ýaly çagalara niýetlenen hyzmatlaryň mysallary bar, ýöne olar seýrek ýagdaýda meşhurlyk gazanýarlar: ýetginjekleriň köpüsini ene-atanyň gözegçiligini talap edýän programmalary ulanmaga yrmak kyn. Çagalar, köplenç, tehnologiýa düşünişleri taýdan ene-atalaryna garanyňda has ökde we isleýän web sahypasyna we programmasyna girmek üçin aýlawly ýollary gözläp bilýärler.
