Belli bloger JerryRigEverything Apple kompaniýasynyň täze we iň inçe smartfony bolan iPhone Air-i adatdan daşary synaglardan geçirdi. Smartfonyň ýogynlygynyň bary-ýogy 5,6 mm bolandygyna garamazdan, titan korpusly enjam haýran galdyryjy berkligi görkezdi.
Ilki bilen bloger ikinji nesil Ceramic Shield aýnasy bilen goralan ekrany synap gördi. Nelson Moos şkalasy boýunça aýnanyň ýüzüni çyzdy: oňa diňe ýedinji derejede zeper ýetdi, ýöne bu çyzyklar hem görünmeýär diýen ýaly.
Soňra bloger smartfonyň ýylmanan titandan ýasalan gapdal gyralaryny barlady. Olar adaty päki degse-de çyzylýar, ýöne smartfonyň düwmeleri, käbir bäsdeşlerinden tapawutlylykda, ýerinden gaçmady.
Bloger ekrany ot bilen hem barlap gördi – displeý zeper ýetmezden bu synaga çydady.
Ýöne iň esasy synag iPhone Air smartfonyny egreltmek boldy. Nelson smartfona öňünden we yzyndan agram salyp, egreltmäge synanyşdy, ýöne çarçuwa sähel egrelip, ýene öňki ýagdaýyna gaýdyp geldi. Smartfony diňe garažda ýokary göteriji kranyň kömegi bilen egreltmek başartdy. Munuň üçin iPhone Air-e 97 kg güýç bilen agram salyndy. Ekranyň aýnasy döwüldi, ýöne displeý işlemegini dowam etdirdi, yzky panel bolsa asla bitin galdy.
Blogeriň gelen netijesine görä, gündelik durmuşda iPhone Air-i egreltmek mümkin däl, şonuň üçin adaty ulanylyş we hatda smartfonyň üstünde tötänleýin oturmak hem oňa hiç hili zyýan ýetirmez.
