Bir ýyl ozal Hytaýyň BYD kompaniýasy ähli tekerleri garaşsyz herekete gelýän, “tank öwrümini” ýerine ýetirmäge we hatda suwda saklanmaga-da ukyply YangWang U8 wnedorožnigi bilen tanyşdyrdy. Indi awtoulag öndürijisi bahasy 179 800 dollar bahasy bolan U8L-iň uzaldylan görnüşini çykardy.
Täze modeliň esasy tapawutly tarapy awtoulagda alty ýolagçyny rahat ýerleşdirmäge we goş goýulýan bölümiň göwrümini 1115 litre çenli saklamaga mümkinçilik berýän arka gyrasy we uzaldylan teker bazasydyr (3050 mm-iň ýerine 3250 mm). Awtoulagyň umumy uzynlygy 5400 mm, ini - 2049 mm, beýikligi - 1921 mm. Ýükdanynyň açylyş täri üýtgedi: aşaky borty serpilip, iki gapdala açylýan goşa gapysy oňa agyr ýükleri ýüklemäge mümkinçilik berýär.
Salonyň ikinji hataryndaky ýolagçylar üçin iň ýokary rahatlyk göz öňünde tutulan: “nol dartyş güýji” funksiýaly, owkalaýjyly, çekip çykarylýan stolly oturgyçlar, simsiz zarýad beriş we 21,4 dýuýmlyk ekran. Gurnalan sowadyjy azyklary sowadyp saklaýar we zerur bolsa bölümiň içindäkini 50 gradusa çenli gyzdyryp bilýär.
Enjamyň 32 dinamikli Dynaudio akustika we üç sany multimediýa paneli bilen üsti ýetirilýär.
Wnedorožnigiň kuwwaty umumy alaňda 1180 at güýji we 55,53 kWt batareýa bolan dört sany elektrik hereketlendirijisi bilen üpjün edilýär. Awtoulag elektrik çekişinde 200 km ýol geçýär, ýöne iki litrlik içinden ýandyrylýan hereketlendirijisi hem bar - onuň bilen we 90 litrlik ýangyç baky bilen geçýän ýol ätiýaçlygy 1160 km-ä ýetýär. Çalt zarýad beriji stansiýada 30%-den 80%-e çenli zarýad bermek 13,5 minut wagt alýar.
U8L God’s Eye sürüjä kömek ulgamy bilen enjamlaşdyrylandyr: üç sany lidary, bäş radary, 18 kamerasy, datçigi we 300 metre çenli aralykda işleýän teplowizory bar. Awtoulagda 14 sany howa ýassygy, giňeldilen hakykatly proýeksiýa ekrany we ösen ses izolýasiýa ulgamy bar.
Salondaky yşyklandyryş 128 öwüşgini saýlamaga mümkinçilik berýär.
Wnedorožnigiň kuzowyndaky nyşanlar 24 karat altyn bilen bezelipdir. Soňky ýyllaryň şunuň ýaly ajaýyp elektrik awtoulaglary, adatça, bort kameralaryndan ýazga alýan ösen howpsuzlyk ulgamlary bilen gelýär.
