Özbegistanyň Prezidenti Şawkat Mirziýoýew ýurduň demirgazyk-günbatarynda – Garagalpagystanyň Üstýurt sebitinde uly gaz ýatagynyň üstüniň açylandygyny habar berdi. Muny respublikanyň Baştutanynyň metbugat gullugy ýetirýär.
Mirziýoýew ozal nebitgaz pudagynda gözleg işleriniň 2,5-3 müň metr çuňlukda geçirilendigini aýtdy. 2025-nji ýylda ýurduň senagat taryhynda ilkinji gezek 6 500 metr çuňlukda guýy burawlandy we hut şol ýerde uly gaz ýataklaryny tapmak başartdy. Şol bir wagtyň özünde, Prezident gaz gorlary barada giňişleýin maglumat bermedi.
Özbegistanda wolfram, molibden, titan ýaly minerallaryň ätiýaçlyklary köp.
“Hasaplamalara görä, şeýle baýlyklaryň dünýädäki gorlarynyň 10-15%-i Merkezi Aziýada, şol sanda Özbegistanda jemlenýär” – diýip, Mirziýoýew belledi. Ol bu baýlyklary ýokary bahaly önümlere öwürmek üçin ylmyň, bilimiň we innowasiýalaryň zerurdygyny sözüniň üstüne goşdy.
Statistika agentliginiň maglumatlaryna görä, 2024-nji ýylda Özbegistanda gaz önümçiliginiň möçberi 44,59 mlrd kub metr boldy, bu 2023-nji ýyl bilen deňeşdirilende 4,5% azdyr. Nebit önümçiligi 8,5% – 713 müň tonna çenli azaldy, gaz kondensatynyň önümçiligi bolsa 1,3% – 1 214 müň tonna çenli ýokarlandy.
