ABŞ-nyň Prezidenti Donald Tramp TikTok üçin hukuklary Hytaýyň ByteDance kompaniýasyndan täze eýesine geçirmegiň möhletini dördünji gezek uzaltdy. Eger ylalaşyk gazanylmasa, programma ABŞ-da petiklenip bilner diýip, The New York Times habar berýär.
15-nji sentýabrda ABŞ bilen Hytaý TikTok-yň amerikan tarapynyň gözegçiligine geçmegi barada çarçuwaly ylalaşygyň gazanylandygyny aýtdy. “Biziň ony [TikTok] satyn almak isleýän örän uly kompaniýalar toparymyz bar” – diýip, Tramp ertesi gün habar berdi. Ol 19-njy sentýabrda “ähli zady tassyklamak” üçin HHR-iň Başlygy Si Szinpin bilen gepleşik geçirmegi meýilleşdirýändigini belledi.
Şertnama barada giňişleýin maglumat ýok. Ýöne KHBS hytaý tarapynyň amerikan hünärmenlerine TikTok-yň teklipleriniň esasy algoritmlerini göçürmek we çalyşmak mümkinçiligini bermäge razy bolandygyny habar berýär.
The Wall Street Journal-yň we Bloomberg-iň maglumatlaryna görä, hyzmatyň ABŞ-da işlemegi üçin täze holding kompaniýasy dörediler. Maýadarlar konsersiumynyň düzümine Oracle, Andreessen Horowitz we Silver Lake maýa goýum kompaniýasy girer. Olar TikTok-yň amerikan bölümçesiniň 80%-ini gözegçilikde saklar, galan bölegi ByteDance-da galar. Müdirler geňeşiniň düzümi hem, esasan, amerikan maýadarlaryndan ybarat bolar, agzalaryň birini bolsa gönüden-göni ABŞ-nyň hökümeti bellär.
