Google Pixel brendi 2025-nji ýylyň birinji ýarymynda premium smartfonlaryň bazarynda rekord ösüşi görkezdi. Bu barada Counterpoint Research analitiki kompaniýasyna salgylanyp, 9to5Google habar berýär.
Pixel smartfonlarynyň satuwy geçen ýylyň degişli döwri bilen deňeşdirilende 105% ýokarlandy. Bu hem Google-a ilkinji gezek global üpjünçilik boýunça premium-smartfon öndürijileriniň ilkinji bäşligine girmäge mümkinçilik berdi.
Uly ösüşe, esasan, 2024-nji ýylda Pixel 9 hatarynyň üstünlikli çykmagy täsir etdi. Ol hünärmenlerden we alyjylardan ýokary bahalary aldy. Şeýle-de, ösüşe täze bazarlara – şol sanda Gündogar Ýewropa, Günorta-Gündogar Aziýa we Günorta Amerika ýaýramagy hem-de marketing strategiýasy we eksklýuziw Google funksiýalary bilen arassa Android-e üns berilmegi ýardam etdi.
Apple-iň henizem bazaryň 62%-i bilen agdyklyk ediji orny eýeleýändigine we Samsung-yň 20%-i saklaýandygyna garamazdan, hut Google 600 dollardan ýokary smartfonlaryň segmentinde iň çalt ösýän brend boldy. Deňeşdirmek üçin, Huawei we Xiaomi, degişlilikde, 24% we 55% ösüş görkezdi, ýöne Pixel-iň ösüş depgininden öňe geçip bilmedi.
Analitikler Pixel-iň täze ýurtlara ýaýramagynyň brendiň ornuny berkidip, ösüşini çaltlaşdyryp biljekdigini belleýär. Häzirki wagtda Google premium segmentde ynamly ornuny saklaýar.
