Legendary amerikan kinokompaniýasy Garri Potter baradaky kitaplardan Germiona Greýnjer bilen Drako Malfoýyň gizlin söýgüsi barada fanfikiň esasynda döredilen kitap üçin hukuk satyn aldy. The Hollywood Reporter-iň habar bermegine görä, şertnamanyň bahasy 3 mln dollar boldy.
Studiýa ony ekranlaşdyrmak hukugyny hem aldy.
“Fanfik” diýlip, eýýäm bar bolan kitaplaryň ýa-da filmleriň esasynda muşdaklar tarapyndan ýazylan höwesjeňleriň eserine aýdylýar.
“Baglanan” (asyl ady – Manacled) diýlip atlandyrylýan şeýle eserleriň biri 2018-2019-njy ýyllarda awtor SenLinYu tarapyndan internet ulgamynda neşir edildi we “Dramion” kategoriýasynda iň meşhur hekaýat boldy. Onuň sýužeti “Garri Potter we Feniks ordeni” kitabyndaky wakalardan soň ýaýbaňlanýar: Garri Potter ölýär, Wolan-de-Mort ýeňýär, Drako Malfoý bolsa ýokary hökümdar bolýar we Germiona Greýnjer oňa ýesir hökmünde iberilýär. KHBS-iň maglumatlaryna görä, teksti 10 milliondan gowrak adam okady.
2024-nji ýylda fanfik açyk elýeterlilikden aýryldy. Awtor esasy sýužeti saklap, üýtgedilen gahrymanlar bilen ony kitaba öwürdi. Täze görnüş Alchemised adyny aldy. Onda waka başga älemde bolup geçýär, baş gahrymanlar bolsa – tebip we jadygöý.
Kitap 23-nji sentýabrda dükan tekjelerinde peýda bolar, ol 750 müň nusga tiraž bilen çykar. Neşirýatçylar Alchemised-iň 21 dile terjime ediljekdigini habar berdi.
