NASA-nyň Marsda hereket edýän Perseverance enjamy tarapyndan ýygnalan nusga gadymy mikrob durmuşynyň yzlaryny saklap biler. Bu barada 2025-nji ýylyň 10-njy sentýabrynda Nature žurnalynda neşir edilen NASA-nyň ylmy gözleginde aýdylýar. Agentlik bu açyşyň Marsda ýaşaýşyň bolup bilmeginiň iň ygtybarly subutnamasydygyny belleýär.
Gürrüň Cheyava Falls daşy barada gidýär. Ondan alnan Sapphire Canyon atly materialda biosignaturalar – biologiki gelip çykyşy görkezip biljek maddalar ýa-da gurluşlar ýüze çykaryldy.
Perseverance 2021-nji ýylda Ýezero kraterinde gondy. 2024-nji ýylda ol gaýalaryň üstünde “gülälek tohumlary” we “bars tegmilleri” adyny alan üýtgeşik emele gelmeleri tapdy. Seljerme olarda biologiki reaksiýalaryň netijesi bolup biljek demriň we kükürdiň birleşmesiniň bardygyny görkezdi.
Alymlar şeýle minerallaryň janly organizmler gatnaşmazdan emele gelip bilendigini, ýöne munuň üçin, iň bolmanda, ylma heniz belli bolmadyk aýratyn şertleriň gerekdigini belleýär. Gutarnykly netijeleri 2030-njy ýyllarda nusgalar Ýere getirilenden soň kesgitläp bolar.
