Paramount Skydance kompaniýasy Warner Bros Discovery-ny (WBD) satyn almak barada teklip taýýarlaýar. Bu ABŞ-da mediakompaniýalaryň iň uly birleşmesi bolup biler diýip, The Guardian habar berýär.
Şertnama Warner Bros. kinostudiýasy, CNN teleýaýlymy, DC Comics franşizasy we birnäçe teleýaýlymlar, şol sanda HBO ýaly aktiwleri bir brendiň astynda birleşdirmegi göz öňünde tutýar.
Wall Street Journal-yň maglumatlaryna görä, Paramount Ellisonlaryň maşgalasynyň goldaw bermeginde, esasan, pul teklibini gözden geçirýär.
Bu habarlaryň peýda bolan wagty WBD-niň paýnamalary penşenbe güni tas 34% ýokarlanyp, söwdany 29% ösüş bilen tamamlady.
Awgustda Dewid Ellison Paramount-a gözegçiligi ele alandan soň, birnäçe uly şertnamalary baglaşdy. Olaryň arasynda ABŞ-da UFC-ni ýaýlyma bermek barada 7,7 mlrd dollarlyk şertnama, doganlar Daffer bilen hyzmatdaşlyk we Call of Duty oýnuny ekranlaşdyrmak üçin Activision bilen hyzmatdaşlyk bar.
Hünärmenleriň pikiriçe, Paramount bilen WBD-niň birleşmegi striming bazaryny üýtgedip, ony adaty telewideniýä ýakynlaşdyryp biler. Şol bir wagtyň özünde tankytçylar bäsdeşligiň peselip biljekdigini nygtaýar. Mundan başga-da, kompaniýalar monopoliýa garşy edaralaryň ünsüni çekip biler.
