Onkologiýada iki täze çemeleşme rak keseliniň bejergisini ep-esli üýtgäp biler. Olar barada The Financial Times gazetinde çap edilen makalada aýdylýar.
Birinjisi - radioaktiw izotoplary göni çişlere eltmäge mümkinçilik berýän, Şweýsariýanyň Novartis kompaniýasy tarapyndan işlenip düzülen radioligand bejergisidir. Derman infuziýa görnüşinde damardan goýberilýär: radioaktiw izotoplar rak öýjüklerine baglanýan ligand molekulalaryna birikdirilýär we radiasiýanyň maksatly hereketini üpjün edýär.
Kompaniýa bejerginiň dürli tapgyrlarda synagdan geçilýändigini we ony beýleki bejeriş usullary bilen sazlaşdyrmagyň mümkinçiliginiň öwrenilýändigini belleýär. Radioligand, sagdyn dokuma zeper ýetirmezden, diňe çiş öýjüklerine täsir edýär. Bejerginiň köpçülikleýin ulanylmagy radioaktiw materialy alandan soň, dermanlary çalt öndürmegiň zerurdygy, radiasiýa goragly hassahanalaryň mukdarynyň çäklidigi we galyndylary saklamagyň kynçylyklary sebäpli çylşyrymlaşýar. Novartis bu usulyň giňden ulanylmagy üçin doly infrastrukturany döretmeklige 10-15 ýyl gerek boljakdygyny çaklaýar.
Ikinji barlag Günorta Kaliforniýa uniwersitetiniň Kek lukmançylyk mekdebiniň alymlary tarapyndan geçirildi. Olar IL-23 immun belogyny petiklemek HPV sanjymyny bar bolan çişlere garşy täsirli edýändigini görkezdi. Bu çişiň töwereginde jemlenýän we bedeniň rak keseline, esasanam, WPÇ bilen baglanyşykly çişlere garşy göreşýän T öýjüklerini işjeňleşdirýär.
Munuň bilen ugurdaşlykda Nemes rak keselini öwreniş merkeziniň we Geýdelberg uniwersitetiniň barlagçylary kremniniň nanobölejiklerine esaslanýan bejeriş sanjymyny işläp taýýarlaýarlar. Ol rak öýjüklerine hüjüm etmäge ukyply sitotoksiki T öýjüklerini işjeňleşdirýär.
Radioligand bejergisi we WPÇ garşy sanjymlar onkologiýa kesellerini maksatly bejermegiň geljegini açýar we dürli çişleriň bejergisine çemeleşmäni üýtgedip biler.
