“Ferrari” filmini döredijileriň biri bolan italýan prodýuseri Andrea Ýerwolino modelýer Jorjo Armani barada terjimehal filminiň düşüriljekdigini mälim etdi. Bu barada Deadline neşiri habar berýär.
Film XX we XXI asyrlaryň iň abraýly moda dizaýnerleriniň biri diýlip atlandyrylýan Armaniniň şahsy we hünär durmuşyna bagyşlanar. Ýerwolino taslamanyň üstünde birnäçe aý işlenendigini we onuň özüniň dünýä derejesindäki täzelikçä hormat goýmak isleginiň netijesi bolandygyny belledi. Ssenarini ozal prodýuser bilen ençeme gezek hyzmatdaşlyk eden Bobbi Moresko ýazar.
“Armaniniň ýogalmagy Italiýa we tutuş dünýä üçin Armani adynyň gymmatyny we ähmiýetini ýene bir gezek nygtady” – diýip, Ýerwolino aýtdy.
Jorjo Armani 4-nji sentýabrda 92 ýaşynda aradan çykdy.
Sentýabryň ahyrynda Milanyň Pinakoteka Brera galereýasynyň howlusynda meşhur modelýeriň kolleksiýasynyň soňky görkezilişi bolar. Ilkibaşda ol Milandaky Moda hepdeliginiň jemi hökmünde göz öňünde tutulypdy we Armani öýüniň 50 ýyllygy bilen gabat gelmelidi. Ýubileý görkeziliş üçin ýeri modelýeriň hut özi saýlady we oňa taýýarlyk gördi. Şeýle-de, galereýada onuň döredijiligine bagyşlanan sergi açylar.
Ozal, 1990-njy ýylda Martin Skorseze Jorjo Armani barada “Made in Italy” ady bilen gysga metražly dokumental film düşüripdi. Onda dizaýner maşgalasynyň we Milanyň brendiň döredilişine ýetiren täsiri barada gürrüň berdi we iş prosesi bilen paýlaşdy.
