Albert Eýnşteýniň skripkasy Beýik Britaniýada auksionda satylar. Söwdalaşyklar 8-nji oktýabrda Dominic Winter guramasy tarapyndan geçiriler. Saz guralynyň bahasy 270 000 – 405 000 dollar aralygynda bolar.
Eýnşteýn skripkany Germaniýada 1890-njy ýyllarda, entek otnositellik teoriýasynyň awtory we Nobel baýragynyň eýesi hökmünde dünýä meşhur bolmanka edinipdi. Saz çagalykdan onuň durmuşynyň möhüm bölegi bolupdy we ol häli-şindi bu saz guralyny çalypdyr.
1930-njy ýyllarda milletçiler häkimiýet başyna gelensoň, Eýnşteýn ABŞ-a göçdi. Ol skripkany tigir we filosofiýa kitaby bilen bilelikde kärdeşi Maks fon Lauwa berdi. Iki onýyllykdan soň fon Lau bu zatlary alymyň muşdagy Margareta Hommrihe berdi. Onuň maşgalasy olary 70 ýyldan gowrak saklady we ahyrda Hommrihiň ýuwlugy guraly auksiona goýmak kararyna geldi.
Döwürdeşleri Eýnşteýniň, köplenç, dostlary we kärdeşleri bilen aýdym-saz agşamlaryny geçirendigini gürrüň berdi. Onuň çykyşy professional bolmasa-da, ýürekdenligi we duýgulylygy bilen tapawutlanypdyr. Ol skripkany "bagtlylyk üçin" çalýandygyny we aýdym-sazy möhüm aragatnaşyk serişdesi hasaplaýandygyny aýdýar eken. Iň halanýan kompozitorlary Motsart, Bah we Bethowen bolupdyr. Alym köp ideýalaryň skripka çalýarka kellesine gelendigini boýun alypdyr.
