Hytaý Ýeri kosmos howplaryndan goramak tehnologiýasynyň netijeliligini barlamak üçin, asteroidi urmak boýunça görkezme missiýasyny taýýarlaýar. Bu barada Hytaýyň Aý maksatnamasynyň baş inženeri Wu Weýžen çuň kosmos boýunça maslahatda aýtdy.
Missiýa iki sany kosmos enjamyny – synçy we zarba urujy enjamy uçurmagy göz öňünde tutýar. Birinjisi asteroidiň ýanynda bolup, onuň parametrlerini bellik etmeli we maglumatlary Ýere ibermeli. Ikinji enjam zarba urar, şondan soň alymlar asman jisiminiň hereket ediş ýolunyň üýtgemelerini yzarlar. Netijeler howply bolup biljek jisimleri saklamak we bitaraplaşdyrmak usullaryny kämilleşdirmäge mümkinçilik berer.
Asteroidleriň köpüsi atmosferada ýanýandygy üçin Ýere howp salmaýar. Muňa garamazdan, alymlar uly asman jisimi bilen çaknyşmagyň nazary ähtimallygynyň bardygyny we onuň betbagtçylykly netijelere getirip biljekdigini belleýär. Takmynan, 66 mln ýyl mundan ozal Çiksulub meteoritiniň gaçmagy hut şeýle boldy, ol dinozawrlaryň ölmegine getirdi.
Ozal şuňa meňzeş tejribeler beýleki ýurtlar tarapyndan hem geçirildi. 2022-nji ýylyň sentýabrynda NASA Dimorfos asteroidine DART zonduny iberdi. Zarba onuň ýoluny üýtgetdi we asman jisimini onlarça bölege böldi. Şeýle tejribe planetanyň amaly goragynyň mümkindigini tassyklaýar.
