9-njy sentýabrda Apple kompaniýasy uly tanyşdyrylyş dabarasyny geçirip, onda özüniň täze önümlerini, şol sanda iPhone 17 smartfon hataryny hödürlär.
Tanyşdyrylyş Apple-iň resmi saýtynda we onuň YouTube kanalynda ýaýlyma berler. Başlanýan wagty – Aşgabat wagty bilen 22:00.
Kompaniýanyň dört iPhone 17 modelini görkezmegine garaşylýar: 6,3 dýuým ekranly we iki kameraly esasy wersiýa, 6,6 dýuým displeýli we bir kameraly iň inçe smartfon Apple iPhone 17 Air, şeýle-de 6,3 we 6,9 dýuým ekranly we üç kameraly iPhone 17 Pro we Pro Max modelleri.
Tanyşdyrylyşda Apple Watch 11, Apple Watch Ultra 3 sagatlary we AirPods Pro 3 nauşnikleri hem görkezilip bilner. Kompaniýanyň Apple Watch SE 3, AirTag 2 ýaly beýleki gurluşlary hem görkezip biljekdigi barada gürrüňler bar.
Tanyşdyryşyň öňüsyrasynda täze iPhone smartfonlarynyň akkumulýator sygymy barada maglumatlar Internete syzdy. Olardan ugur alsaň, käbir modeller iki wersiýada – SIM karty üçin fiziki slotly we onsuz çykarylar. Wersiýa baglylykda, akkumulýatorlar dürli sygyma eýe bolar:
- iPhone 17 – 3693 mA/sag;
- iPhone 17 Air – 3149 (SIM karty üçin slotsuz) ýa-da 3036 mA/sag;
- iPhone 17 Pro – 4252 ýa-da 3988 mA/sag;
- iPhone 17 Pro Max – 5088 ýa-da 4823 mA/sag.
Şeýle-de, Pro modellerde kameranyň 8 esse optiki ýakynlaşdyrma eýe boljakdygy habar berilýär. Mundan başga-da, iPhone 17 Pro-da we Pro Max-da bug kamerasy (vapor chamber) ulanylar, bu hem A19 Pro prosessoryndan ýylylygy netijeli aýyrmaga we has agyr işlerde öndürijiligi ýokarlandyrmaga mümkinçilik berer.
Eger syzma maglumatlar tassyklansa, täzelenmeler soňky ýyllarda Pro hatary üçin iň ähmiýetlileriň biri bolar.
