Kanada ABŞ-yň çäginden daşarda Neuralink beýni implantlaryny oturtmak boýunça ilkinji ýurt boldy. Torontodaky uniwersitet hassahanasynda oňurgasy şikes alyp, ysmaz bolan iki näsag pikirleri bilen kompýuteri dolandyrmagy öwrenmäge mümkinçilik berýän implantlary aldy.
Şular ýaly ilkinji operasiýalar 27-nji awgustda we 3-nji sentýabrda Kanadada geçirildi diýip, Global News habar berýär. Ilon Maskyň Neuralink başlangyjy klinikany iň inçe elektrodlary beýni bardasyna ýokary takyklyk bilen ýerleşdirip bilýän ýöriteleşdirilen robot bilen üpjün etdi.
Kanadada Neuralink-iň kliniki synaglary resmi taýdan geçen ýylyň noýabr aýynda başlandy. Täze meýletinçileri gözlemek işi ilkinji üstünlikli implantasiýalardan soň hem dowam etdiriler. Ozal şeýle operasiýalar diňe Amerikanyň Birleşen Ştatlarynda geçirilipdi, bu ýerde 2024-nji ýylyň ýanwaryndan bäri ýedi hassa implant aldy.
Şonuň ýaly-da, Neuralink görüşi bölekleýin dikeltmek üçin enjamyň üstünde işleýär. Ilon Mask şeýle implantanyň ilkinji prototipiniň geljek ýyl geçiriljek kliniki synaglaryň çäklerinde ýerleşdirmegiň meýilleşdirilýändigini aýtdy. Onuň sözlerine görä, ol görüşi doly dikeldip bilmez, emma kör hassalaryň durmuş derejesini ýokarlandyrmaga mümkinçilik berer.
