“Red Bull” toparynyň sürüjisi Maks Werstappen 7-nji sentýabrda Monsada geçirilen Italiýanyň Gran-prisinde ýeňiş gazandy.
Niderlandly ýaryşa gatnaşyjy pouldan başlady, ýöne ilkinji aýlawlarda Lando Norrisden (“Maklaren”) yza galdy. Soňra Werstappen birinji orna gaýdyp gelip, ynamly ýeňiş gazandy.
Soňky aýlawlarda Oskar Piastri (“Maklaren”) Norrisiň pit-stopda eglenmeginiň netijesinde ikinji orna çykdy, ýöne toparyň buýrugy bilen bu orny ýoldaşyna gaýtaryp berip, pellehana üçünji bolup geldi.
“Ferrari” öý ýaryşynda münberi eýeläp bilmedi: Şarl Lekler dördünji boldy, Lýuis Hemilton bolsa altynjy netijäni görkezdi. Bäşinji orny Jorj Rassell (“Mersedes”) eýeledi.
Çempionatda Italiýanyň Gran-prisinden soň 324 utuk bilen Oskar Piastri öňde barýar, ikinji orunda Lando Norris – 293, üçünji orunda Maks Werstappen – 230 ýerleşýär.
Konstruktorlaryň kubogynda “Maklaren” uly tapawut bilen birinji orny eýeleýär – 617 utuk. Onuň yzyndan “Ferrari” (280), “Mersedes” (260) we “Red Bull” (239) gelýär.
