Ispaniýaly tennisçi Karlos Alkaras erkekleriň arasynda geçirilen ABŞ-nyň Açyk çempionatynyň (US Open) ýeňijisi boldy. Ol finalda italiýaly Ýannik Sinneri dört setde 6:2, 3:6, 6:1, 6:4 hasabynda utdy.
22 ýaşly türgen üçin bu “Uly tuwulga” ýaryşlarynda altynjy titul boldy. Şu möwsümde ol “Rolan Garrosyň” hem ýeňijisi bolupdy.
Alkarasyň garşydaşy, 24 ýaşly Sinner ýeňiş gazanan ýagdaýynda “Uly tuwulga” ýaryşlaryndaky ýeňişleriniň sany boýunça hasaby deňlärdi, ýöne häzirlikçe onuň hasabynda dört titul bar.
Belläp geçsek, Alkaras we Sinner täze tennis şalary hasaplanýar. Olar geçen we häzirki möwsümiň sekiz esasy ýaryşynyň ählisinde ýeňiji titullaryny özara paýlaşdy.
Şahsy duşuşyklarda hasap ispaniýalynyň peýdasyna 10-5 boldy.
US Open-däki ýeňşiniň netijesinde Alkaras dünýä reýtinginiň birinji setirine gaýdyp gelip, Sinneri gysyp çykarar. Onuň üçin bu häzirki möwsümde ýedinji we karýerasynda 23-nji titul boldy. Ol ýeňşi üçin 2000 reýting utugyny we 5 mln dollar gazanar. Sinner finalçy hökmünde 1300 utuk we 2,5 mln dollar alar.
