Orbitada hepdeläp işleýän kosmonawtlar üçin kir ýuwmak işi iň kyn meseleleriň biri bolmagynda galýar: suw üpjünçiliginiň çäkliligi we enjamlaryň ýetmezçiligi sebäpli, eşikler gaty hapa bolýança geýilýär we soň zyňylýar.
South China Morning Post gazetiniň habar bermegine görä, Hytaýyň kosmos barlaglary we kosmonawtlary taýýarlaýyş merkeziniň hünärmenleri bu meseläni 800 gram egin-eşik ýuwmak üçin bary-ýogy 400 millilitr suw sarp edýän kir ýuwujy maşynyň taslamasyny işläp düzmek bilen çözdüler.
Ulgam matanyň üstüne ownuk damjalaryň dumanlaryny sepmek bilen işleýär, şondan soň dezinfeksiýa niýetlenen ozon ulanylýar. Egin-eşikler bir wagtyň özünde galan ozony ýok edýän gyzgyn howa bilen guradylýar. Datçikler we süzgüçler zyýanly gazlaryň we bölejikleriň çykmagynyň öňüni alýar. Modelirlemä görä, sterilizasiýanyň derejesi 99,9% -e ýetýär.
Işläp düzüjiler täze ulgamyň azyndan bäş ýyl hyzmat etjekdigini hasapladylar. Geljekde onuň has uzak möhletli missiýalar üçin niýetlenen prototipini döretmek we tehnologiýanyň netijeliligini ýokarlandyrmak göz öňünde tutulýar. Hasaplamalara görä, bu enjamy ulanmak kosmonawtlara eşigi orbita 60% az äkitmäge mümkinçilik berer.
