ÝUNISEF-iň täze seljermesi 2026-njy ýyla çenli bilime berilýän halkara kömegiň ABŞ-nyň 3,2 milliard dollary ýa-da 24% azalyp biljekdigini görkezýär.
Guramanyň hasaplamalaryna görä, eger maliýe kömegi azaldylsa, ýene 6 million çaga bilime elýeterliligi ýitirip biler. ÝUNISEF munuň Germaniýanyň we Italiýanyň ähli başlangyç mekdepleriniň umumy okuwçylarynyň sany bilen deňleşýändigini belleýär.
6 million çagadan 30%-i ynsanperwer çökgünliginiň bar şertlerinde ýaşaýar. Netijede, mekdebe gatnamaýan çagalaryň umumy sany häzirki 272 milliondan 278 milliona çenli artar.
“Bilim býujetinden aýrylan her bir dollar – bu diňe bir maliýe çözgüdi däl-de, çaganyň ykbalydyr. Aýratyn-da, adatdan daşary ýagdaýlarda bilim, köplenç, çagalara lukmançylyk kömegine, goraga we azyk önümlerine elýeterliligi üpjün edip, halas ediş halkasyna öwrülýär. Şeýle-de, ol çaga garyplykdan çykyp, has gowy geljegi gurmak üçin örän gowy mümkinçilik berýär” – diýip, ÝUNISEF-iň ýerine ýetiriji müdiri Ketrin Rassel aýtdy.
Has çynlakaý netijeler bilen ýüzbe-ýüz bolup biljek ýurtlaryň arasynda Kot-d’Iwuar we Mali bar. Ol ýerde okaýanlaryň sany, takmynan, 4% azalar, bu, degişlilikde, 340 müň we 180 müň okuwça barabardyr.
Hatda okuwyny dowam etdirýän çagalar we ýaşlar hem kynçylyklara sezewar bolup biler. Ulgam çäreleriniň – okuw meýilnamalaryny taýýarlamagyň, bilimiň hiline baha bermegiň we mugallymlary taýýarlamagyň maliýeleşdirilmegi azaldylan ýagdaýynda azyndan 290 million okuwçyda bilimiň hili pese gaçyp biler.
“Çagalaryň bilimine maýa goýmak – bu hemmelere peýda getirjek geljek üçin iň gowy maýa goýumlaryň biri. Ýurtlar çagalary bilimli we sagdyn bolanda has köp ösüş gazanýar. Bu has durnukly we gülläp ösýän dünýäni döretmäge hem ýardam edýär” – diýip, Rassel belledi.
