2026-njy ýylyň dünýä çempionaty üçin Günorta Amerikanyň saýlama ýaryşynyň gutarmagyna bir tapgyr galanda gönüden-göni dünýä çempionatyna gatnaşjak alty toparyň ählisi belli boldy. Göni ýollamany Argentinanyň (38 utuk), Braziliýanyň (28), Urugwaýyň (27), Ekwadoryň (26), Kolumbiýanyň (25) we Paragwaýyň (25) milli ýygyndylary aldy.
5-nji sentýabrda tamamlanan tapgyryň jemi boýunça, KONMEBOL-dan çempionata birbada üç milli ýygyndy çykdy, 5 oýnuň 4-üsi ýer eýeleriniň peýdasyna birmeňzeş hasap bilen tamamlandy. Urugwaý öz meýdançasynda Peruwy (3:0), Kolumbiýa Boliwiýany (3:0) utdy. Diňe Paragwaý bilen Ekwador gol geçirmedi (0:0), ýöne netije iki toparyň-da çempionata möhletinden ir çykmagy üçin ýeterlik boldy.
Argentina hem Wenesuelany 3:0 hasabynda utdy. Lionel Messi iki gol geçirdi, ýene bir goly Lautaro Martines girizdi. Bu oýna aýratyn üns berildi, çünki duşuşyk Messi üçin milli toparyň düzüminde soňky öý oýny bolup biler.
Braziliýa öz oýnunda Çilini 3:0 hasabynda utdy. Gollary Estewao, Lukas Paketa we Bruno Gimaraýns geçirdi.
Yklymara pleý-off oýunlaryna gatnaşmaga hukuk berýän ýedinji orny Wenesuela eýeleýär. Boliwiýa ondan bir utuk yza galýar we pleý-offa düşmek mümkinçiligini saklaýar. Çiliniň we Peruwyň milli ýygyndylary dünýä çempionatyna çykmak üçin matematiki mümkinçiliklerini ýitirdi.
