Papua - Täze Gwineýanyň barlagçylary ýelkenli akulanyň seýrek görnüşini (Gogolia filewoodi) tapdylar. Bu görnüşi soňky gezek 1970-nji ýylyň iýulynda Astrolýabiýa aýlagynda bir balykçy tutupdyr diýip, Smithsonian Magazine habar berýär.
Journal of Fish Biology žurnalynda çap edilen makalada alymlar 1970-nji ýyllarda beýan edileli bäri uzak wagtlap ýitirim bolan görnüşleriň ilkinji tassyklanan gözegçilikleri bilen tanyşdyrdylar.
Täze maglumatlar Papua - Täze Gwineýanyň Akulalar we skatlar boýunça milli hereket meýilnamasynyň çäginde ýygnaldy. 2020-nji ýylyň mart aýynda ýerli balykçynyň Astrolýabiýa aýlagyna akýan Gogol derýasynyň guýýan ýerinden bäş sany ýelkenli akulany tutandygy mälim boldy. Iki ýyldan soň başga bir balykçy bu görnüşiň taryhda ilkinji erkegini tutdy.
Bu akula uly, giň gözleri, uly kellesi we gysga agzy bilen tapawutlanýar. Arkasynda ýelkene meňzeýän uzyn ýüzgüji bar.
Alymlar ýelkenli ýyndam akula "mikroendemiki", ýagny diňe çäkli ýerde ýaşaýan görnüş bolup biler diýip hasaplaýarlar. Şeýle görnüşler ýaşaýan ýeriniň üýtgeşmelerine diýseň çydamsyzdyr.
San-Hose döwlet uniwersitetiniň deňiz biology Dewid Ebert bu görnüşleriň taryhy taýdan Indoneziýanyň we Papuanyň - Täze Gwineýanyň töwereginde has giň ýaýran bolmagynyň mümkindigini belläp geçdi, ýöne "indi ondan bu soňky uly bolmadyk topar galypdyr".
