Gonkongdan Vocational Training Council topary özüniň guran Sophie 8X elektromobilinde Awstraliýada geçirilen abraýly Bridgestone World Solar Challenge ýaryşynda ýeňiji boldy. Ulag 3021,5 kilometr aralygy geçip, ortaça 68,7 km/sag tizlik bilen 44 sagatda Darwinden Adelaida çenli yklymy kesip geçdi.
Taslamanyň esasy aýratynlygy ulagyň ýeňil bolmagy we energiýany az harçlamagy boldy. Eger adaty elektromobiller, mysal üçin, Tesla Model Y-nyň agramy 1900 kg töweregi bolsa, Sophie 8X-iň agramy 800 kg-den köp däl. 15,2 kWt/sag sygymly akkumulýatoryň agramy bary-ýogy 40 kg barabar, Tesla-nyň batareýasynyň agramy bolsa 770 kg bolup, sygymy 60 kWt/sag-dan gowrakdyr.
Iki orunlyk awtomobiliň üçegi alty inedördül metrlik Gün panelleri bilen örtülen bolup, ol hereket wagty akkumulýatora zarýad berýär. Batareýada energiýa dykyzlygy ýokary bolan (bir kilogram üçin 400 Wt/sag) litiý elementleri ulanyldy. Bu batareýanyň ykjam we ýeňil bolmagyna mümkinçilik berýär.
Awtomobiliň hereketlendirijileri üçünji nesil karbid-kremniý ýarymgeçirijilerinde guruldy. Şeýle tehnologiýa energiýanyň sarp edilişini adaty çözgütler bilen deňeşdireniňde 100 km/sag tizlikde 30% azaldýar.
Ulagyň kuzowy kompýuter modelirlemesiniň kömegi bilen işlenip taýýarlandy, paneller bolsa uglerod süýüminden ýasaldy. Bu howanyň garşylygyny peseldip, awtomobiliň netijeliligini ýokarlandyrýar.
Sophie 8X jemgyýetçilik ýollarynda hereket etmek üçin ygtyýarnama alan Gonkongda ilkinji “Gün mobili” boldy, bu taslamanyň howpsuzlyk ülňülerine laýyk gelýändigini tassyklaýar. Cruiser klasynda gazanylan ýeňiş dogry elektronika eýe bolan ýeňil we aerodinamiki elektromobilleriň adaty elektrokarlardan has netijeli bolup biljekdigini görkezýär.
